96 ஆண்டுகால சாதனை தகர்ப்பு.. லதாம், கான்வே அதிரடியால் முதல் நாளில் நியூசிலாந்து 361 ரன்கள் குவிப்பு

நாட்டிங்ஹாம்: இங்கிலாந்துக்கு எதிரான மூன்றாவது டெஸ்ட் போட்டியின் முதல் நாளில் நியூசிலாந்து அணியின் தொடக்க வீரர்கள் டாம் லதாம் மற்றும் டெவோன் கான்வே ஜோடி 317 ரன்கள் குவித்து, 96 ஆண்டுகால வரலாற்று சாதனையை முறியடித்துப் புதிய உலக சாதனை படைத்துள்ளனர். இங்கிலாந்து - நியூசிலாந்து அணிகள் மூன்று போட்டிகள் கொண்ட டெஸ்ட் தொடரில் விளையாடி வருகின்றன. இதில் முதல் இரண்டு போட்டிகளில் இரு அணிகளும் தலா ஒரு வெற்றியுடன் 1 - 1 என சமநிலையில் இருந்தன. இந்த நிலையில், டிரெண்ட் பிரிட்ஜில் நேற்று தொடங்கிய இத்தொடரைத் தீர்மானிக்கும் இறுதி டெஸ்ட் போட்டியில் டாஸ் வென்ற நியூசிலாந்து முதலில் பேட்டிங் செய்தது. தொடக்க வீரர்களாக களம் இறங்கிய கேப்டன் டாம் லதாம் 151 ரன்களும் (214 பந்துகள்), டெவோன் கான்வே 157 ரன்களும் (224 பந்துகள்) குவித்து இங்கிலாந்து பந்துவீச்சை நாலாபுறமும் சிதறடித்தனர். இந்த ஜோடி முதல் விக்கெட்டுக்கு 317 ரன்கள் சேர்த்தது. இதன் மூலம், இங்கிலாந்துக்கு எதிராக எந்தவொரு விக்கெட்டுக்கும் நியூசிலாந்து வீரர்கள் அமைத்த அதிகபட்ச பார்ட்னர்ஷிப் என்ற வரலாற்றுச் சாதனையை இவர்கள் படைத்தனர். இதற்கு முன்னதாக 1930 இல் ஸ்டீவி டெம்ப்ஸ்டர் - ஜாக்கி மில்ஸ் ஜோடி 276 ரன்கள் எடுத்ததே சாதனையாக இருந்தது. 34 வயதான டெவோன் கான்வே இப்போட்டியில் 157 ரன்கள் எடுத்ததன் மூலம், இங்கிலாந்து மண்ணில் ஒன்றுக்கும் மேற்பட்ட முறை 150 ரன்களுக்கு மேல் எடுத்த இரண்டாவது நியூசிலாந்து வீரர் என்ற அரிய சாதனையைப் படைத்துள்ளார். இதற்கு முன்பு 1973 இல் பெவன் காங்க்டன் இச்சாதனையைச் செய்திருந்தார். கான்வே ஏற்கனவே 2021 இல் லார்ட்ஸ் மைதானத்தில் தனது அறிமுக டெஸ்டில் 200 ரன்கள் அடித்திருந்தார் என்பது குறிப்பிடத்தக்கது. நியூசிலாந்து அணி 317/0 என இமாலய நிலையில் இருந்தபோது, கடைசி பகுதியில் இங்கிலாந்து கேப்டன் பென் ஸ்டோக்ஸ் லதாமை வீழ்த்தி இங்கிலாந்துக்கு முதல் திருப்புமுனையை ஏற்படுத்தினார். அடுத்த ஓவரில் கான்வே 157 ரன்களில் ஜோ ரூட் பந்துவீச்சில் ஆட்டமிழந்தார். பின்னர் ரச்சின் ரவீந்திரா மற்றும் ஹென்றி நிக்கோல்ஸ் குறைந்த ரன்களில் விக்கெட்டை இழக்க, நியூசிலாந்து அணி முதல் நாள் ஆட்டநேர முடிவில் 4 விக்கெட் இழப்பிற்கு 361 ரன்கள் எடுத்தது.