சான் பிரான்சிஸ்கோ: பிபா உலகக் கோப்பை 2026 தொடரின் குரூப் டி பிரிவில் பராகுவே அணிக்கு எதிராக நடைபெற்ற லீக் போட்டியை 0-0 என டிரா செய்த ஆஸ்திரேலியா அணி, தனது உலகக் கோப்பை வரலாற்றிலேயே மூன்றாவது முறையாக அடுத்த சுற்றுக்கு தகுதி பெற்று சாதனை படைத்துள்ளது. சான் பிரான்சிஸ்கோ விரிகுடா பகுதி மைதானத்தில் நடைபெற்ற இப்போட்டிக்கு ஆஸ்திரேலிய அணியின் பயிற்சியாளர் டோனி போபோவிக், தனது தொடக்க ஆட்டக்காரர்கள் வரிசையில் 6 அதிரடி மாற்றங்களைச் செய்து களம் இறக்கினார். இதில் குறிப்பாக 18 வயதான இளம் தற்காப்பு ஆட்டக்காரர் லூகாஸ் ஹெரிங்டன் உலகக் கோப்பை போட்டியில் களம் இறங்கிய மிக இளைய ஆஸ்திரேலிய வீரர் என்ற சாதனையைப் படைத்தார். அறிமுக போட்டியிலேயே அவர் அனுபவம் வாய்ந்த வீரரைப் போல செயல்பட்டு பராகுவே வீரர்களின் கோல் முயற்சிகளைத் தடுத்து நிறுத்தினார். ஆட்டத்தின் முதல் பாதியில் ஆஸ்திரேலிய அணி பந்தை அதிக நேரம் தனது கட்டுப்பாட்டில் வைத்திருந்தது. ஜோர்டி போஸ் மற்றும் கிறிஸ்டியன் வோல்பாடோ ஜோடி வலது பக்கவாட்டில் இருந்து பல கோல் வாய்ப்புகளை உருவாக்கியது. ஆனால் பராகுவே கோல்கீப்பர் ஆர்லாண்டோ கில் அதனைத் தடுத்து நிறுத்தினார். ஆட்டத்தின் இடையே ஆஸ்திரேலிய மிட்பீல்டர் கானர் மெட்காஃபின் கண்ணில் காயம் ஏற்பட்டு ரத்தம் வடிந்த போதிலும், அவர் நெற்றியில் பேண்டேஜ் கட்டிக்கொண்டு தொடர்ந்து விளையாடினார். இரண்டாவது பாதியிலும் இரு அணிகளும் கோல் அடிக்கத் தீவிரமாகப் போராடினாலும், ஆட்டத்தின் இறுதிவரை கோல் எதுவும் விழவில்லை. இறுதியில் போட்டி 0-0 என்ற கணக்கில் டிராவில் முடிந்தது. இந்த டிரா மூலம் ஆஸ்திரேலிய அணி குரூப் டி பிரிவில் அமெரிக்காவுக்கு அடுத்தபடியாக 2வது இடத்தைப் பிடித்து அடுத்த சுற்றுக்கு முன்னேறியுள்ளது. அமெரிக்கா முதலிடம் பிடித்தது. ஆஸ்திரேலிய அணி தனது அடுத்த ரவுண்ட் ஆப் 32 போட்டியை டல்லாஸ் நகரில் இன்னும் 8 நாட்களில் விளையாட உள்ளது. அங்கு அவர்கள் குரூப் ஜி பிரிவில் இரண்டாவது இடம் பிடிக்கும் அணியை எதிர்கொள்ள உள்ளனர்.