திமுக பலம் தினமும் அதிகரிப்பு

திருநெல்வேலி, ஆக.12-

திமுகவில் சேருவோருக்கு இடம் கொடுக்க முடியாமல், செய்வதறியாது திகைத்து நிற்கிறோம் என்று ஆர்.எஸ்.பாரதிகூறினார்.

 தி.மு.க அமைப்பு செயலாளர் ஆர்.எஸ்.பாரதி நெல்லையில் அளித்த பேட்டி வருமாறு-

எடப்பாடி பழனிச்சாமி சறுக்கி விழுந்து பல மாதங்கள் ஆகிவிட்டது. அவர் இனிமேல் மேலெழும்ப முடியாது. அவர் சறுக்கு மரம் ஏறிவிட்டார். இறங்குவது எப்படி என்று தெரியாமல் முழித்துக் கொண்டிருக்கிறார்.

தி.மு.க கூட்டணி உடைந்து விடும் என 2019-இல் இருந்தே சொல்லிக்கொண்டு இருக்கிறார்கள். அ.தி.மு.க கூட்டணியிலிருந்து ஒவ்வொருவராக வெளியேறி கொண்டிருக்கிறார்கள். அ.தி.மு.க-வின் முக்கிய நிர்வாகிகள் ஒவ்வொருவராக தி.மு.க-விற்கு வந்து கொண்டிருக்கிறார்கள். திமுக கூட்டணி மிகவும் பலமாக உள்ளது. 

தி.மு.க-வின் பலம் நாளுக்கு நாள் அதிகரித்து கொண்டே செல்கிறது. எடப்பாடி பழனிச்சாமி இந்த சுற்றுப்பயணம் முடித்த உடன், மேலும் சிலர் தி.மு.க-வுக்கு வந்து விடுவார்கள். எங்கள் கட்சிக்கு வருவோருக்கு இடம் கொடுக்க முடியவில்லை. எங்கள் கட்சிக்கு வந்தவரை என்ன செய்வதென்று தெரியாமல் முழிக்கிறோம். நாடாளுமன்ற தேர்தலின் போது எட்டு முறை பிரதமர் வந்தார். நாங்கள் 40-க்கும் 40 தொகுதிகளில் வெற்றி பெற்றோம்.

அதேபோல அவர் பத்து முறை தமிழ்நாடு வந்தால், சட்டப்பேரவைத் தேர்தலில் 234 தொகுதிகளிலும் நாங்களே வெற்றி பெறுவோம். 

இவ்வாறு அவர் கூறினார்.