Breaking News:
கொச்சி, மார்ச் 17–
ஆசிரியர் அடித்தார்... கிள்ளினார் என மாணவர் தரப்பில் புகார் வந்தால் போலீசார் விசாரிக்கலாம். கைது செய்யக்கூடாது என கேரள ஐகோர்ட் அறிவுறுத்தி உள்ளது.
கேரள மாநிலம் நெய்யாற்றின்கரையை சேர்ந்த ஆசிரியர் சிபின். இவர் 6ம் வகுப்பு மாணவர் ஒருவரை கம்பால் அடித்துள்ளார். இதனால், இவருக்கு எதிராக அந்த மாணவரின் பெற்றோர் அளித்த புகார் அடிப்படையில் விழிஞ்ஞம் போலீசார் வழக்குப்பதிவு செய்தனர். இந்த வழக்கில் முன் ஜாமீன் கோரி ஐகோர்ட்டில் சிபின் மனுத்தாக்கல் செய்தார். அந்த மனுவை விசாரித்த நீதிபதி குன்ஹிகிருஷ்ணன் முன் ஜாமீன் அளித்து பிறப்பித்த உத்தரவு:
ஆசிரியர்கள் கையில் பிரம்பு வைத்திருக்கலாம். அதை எப்போதும் பயன்படுத்த வேண்டிய அவசியமில்லை. ஆசிரியர்களுடன் பிரம்பு இருப்பது மாணவர் சமூகத்தில் ஒரு உளவியல் விளைவை உருவாக்கும். இதன் மூலம், மாணவர்களை சமூக தீமைகள் செய்வதில் இருந்து விலக்கி வைக்க முடியும்.
பள்ளிகளில் கல்வி கற்பிக்கும் போது அல்லது ஒரு மாணவரின் ஒழுக்கம் மற்றும் நடத்தை தொடர்பாக, எந்தத் தீமையும் இல்லாமல் ஆசிரியர் தாக்கினால், அதற்காக அவர் மீது குற்றவியல் வழக்குத் தொடரப்படாமல் பாதுகாக்கப்பட வேண்டும்.
கல்வி முறையை வலுப்படுத்தவும், நாட்டின் எதிர்காலமாக விளங்கும் மாணவர் சமூகத்தின் நலன்களைப் பாதுகாக்கவும் மட்டுமே இந்த நடவடிக்கை. ஒரு மாணவருக்கு அறிவுரை வழங்கியதாலோ அல்லது ஒழுக்கமின்மை மற்றும் மோசமான நடத்தைக்காக சிறிய தண்டனைகளை வழங்கியதாலோ எந்த ஆசிரியரும் பாதிக்கப்படக்கூடாது.
கிள்ளுதல், முறைத்தல், அடித்தல், குத்துதல் போன்ற புகாருடன் போலீசை சில பெற்றோர் அணுகுவார். இதுபோன்ற புகார்கள் பெறப்பட்டால், தேவைப்பட்டால், சம்பந்தப்பட்ட ஆசிரியருக்கும் பாதிக்கப்பட்ட தரப்பினருக்கும் நோட்டீஸ் அனுப்பி, முதற்கட்ட விசாரணையை போலீஸ் அதிகாரிகள் நடத்த வேண்டும். இதுபோன்ற நிலையில், எந்த ஆசிரியரையும் கைது செய்யக்கூடாது.
சிறிய செயல்களுக்கு வழக்குத் தொடுப்பதில் மட்டுமே ஆர்வமுள்ளவர்கள் நம் சமூகத்தில் உள்ளனர். இது புறக்கணிக்கப்பட வேண்டிய ஒன்று. ஆசிரியர்கள் நமது சமூகத்தின் போற்றப்படாத ஹீரோக்கள். அவர்கள் நமது எதிர்கால தலைமுறையின் மனம், இதயம் மற்றும் ஆன்மாவை வடிவமைக்கின்றனர். எனவே, ஆசிரியர்கள் மன உறுதியைக் குறைக்கும் எந்த நடவடிக்கையும் எடுக்கக்கூடாது.
இது தொடர்பாக ஒரு சுற்றறிக்கையை டிஜிபி வெளியிட வேண்டும். மாணவர்கள் கல்வி நிறுவனங்களுக்குள் ஆயுதங்களைப் பயன்படுத்துவது, போதைப்பொருள் மற்றும் மது அருந்துவது பற்றிய செய்தி அறிக்கைகளின் இன்றைய சூழ்நிலையில் அத்தகைய உத்தரவு அவசியம்.
இவ்வாறு அந்த உத்தரவில் நீதிபதி கூறியுள்ளார்.