Breaking News:
ஆனந்த தீபாவளி
கொண்டாடுவோம்
அன்றோர் அசுரன்
அழிந்ததற்காய்….
அடுத்த முறை தீபாவளி கொண்டாடுவோம்…
சில அசுர குணங்கள்
அழிவதற்காய்…
பாகுபாட்டை பட்டாசாய்க் கொளுத்திடுவோம்!
பண்பாட்டை பலகாரமாய்ச் சுவைத்திடுவோம்!
வேறுபாட்டை விறகாக்கி
எரித்திடுவோம்!
விழிப்புணர்வுப் புத்தாடை உடுத்திடுவோம்!
மதவெறியை மத்தாப்பாய்க் கருக்கிடுவோம்!
மனிதநேய மலர்ச்செண்டை ஏந்திடுவோம்!
ஜாதிமுறைக்கு சவப்பெட்டி செய்திடுவோம்
ஜோதியேற்றி தேசமெங்கும்
சுடர் கூட்டுவோம்!
ஏற்றதாழ்வை எரிதழலில் பொசுக்கிடுவோம்!
போற்ற வாழ்ந்து புகழ்மாலை சூட்டிடுவோம்!
மாற்றங்கூறும் மறுமலர்ச்சி
மடல் வரைவோம்!
ஊற்றுநீராய் உண்மை நேசம்
உயர வைப்போம்!
இயலாமை தனைநீக்கி
இன்புறுவோம்
இரப்போரின் நிலைமாற்ற இயங்கிடுவோம்!
கல்லாமைதனை ஒழித்துக் களிப்புறுவோம்!
சொல்லாலே சூளுரைத்து
செயல் காட்டுவோம்!
ஆனந்த தீபாவளி
கொண்டாடுவோம்
அன்றோர் அசுரன்
அழிந்ததற்காய்….
அடுத்த முறை தீபாவளி
கொண்டாடுவோம்…
சில அசுர குணங்கள்
அழிவதற்காய்…
-------
முகில் தினகரன்
கோயமுத்தூர்.