சென்னையில் மத்திய அரசு அதிகாரி ஆன்லைன் “டிஜிட்டல் கைது”

போலி முதலீட்டு செயலிகள் குறித்து பொதுமக்கள் கவனமாக இருக்க வேண்டும்: சென்னை கமிஷனர் அருண் எச்சரிக்கை

சென்னை, 

போலி முதலீட்டு செயலிகள் குறித்து பொதுமக்கள் கவனமாக இருக்க வேண்டும் என்றும் மோசடிக்காரர்களுக்கு வங்கிக் கணக்குகளைத் துவங்கி உதவிடுபவர்கள் மீது சட்ட நடவடிக்கை எடுக்கப்படும் என்றும் சென்னை கமிஷனர் அருண் எச்சரிக்கை விடுத்துள்ளார்.

சென்னையைச் சேர்ந்தவர் டாக்டர் இராமசாமி. இவர் இந்திய அரசின் அறிவியல் மற்றும் தொழில்நுட்ப அமைச்சகத்தின் செயலாளராக பணியாற்றி ஓய்வு பெற்றார். செப்டம்பர் மாதத்தில் இவருக்கு இந்திய தொலைத்தொடர்பு ஒழுங்குமுறை ஆணையத்தில் இருந்து அழைப்பதாகக் கூறி ஒரு தானியங்கி குரல்வழி அழைப்பு வந்தது. அழைத்தவர், அவரது பெயரில் சிம் கார்டுகள் வாங்கப்பட்டதாகவும், சட்டவிரோத விளம்பரங்கள் மற்றும் பிற குற்றங்கள் தொடர்பாக அவர் மீது 14 புகார்கள் பதிவு செய்யப்பட்டுள்ளதாகவும் கூறினார். அவர் ஒரு மணி நேரத்திற்குள் டெல்லி காவல் நிலையத்தில் ஆஜராகுமாறு அறிவுறுத்தப்பட்டார்.

அதன்பிறகு, வாட்ஸ்அப் மூலம் தொடர்பு கொள்ளுமாறு அவரிடம் கேட்கப்பட்டது. தனது கைபேசியில் வாட்ஸ்அப் நிறுவப்படவில்லை என்று கூறியபோது, அந்தச் செயலியைப் பதிவிறக்கம் செய்யுமாறு அவருக்கு அறிவுறுத்தப்பட்டது. டெல்லி காவல்துறை அதிகாரிகள் போல் நடித்த அந்த மோசடிக்காரர்கள், பின்னர் வாட்ஸ்அப் மூலம் அவரைத் தொடர்பு கொண்டு, மனித கடத்தலில் ஈடுபட்டது மற்றும் மும்பையில் உள்ள கனரா வங்கியில் அவரது பெயரில் வங்கிக் கணக்குகள் தொடங்கப்பட்டது உள்ளிட்ட புனையப்பட்ட குற்றச்சாட்டுகளைத் தொடர்ந்து சுமத்தினர்.

பாதிக்கப்பட்டவர் இந்தக் குற்றச்சாட்டுகளை மறுத்தபோது, அந்த மோசடிக்காரர்கள் வாட்ஸ்அப் வீடியோ அழைப்பின் போது, அவரது ஆதார் அட்டை மற்றும் அவரது பெயர் பொறிக்கப்பட்ட கனரா வங்கி டெபிட் கார்டைக் காண்பித்து, அவரது தனிப்பட்ட தரவுகள் திருடப்பட்டுவிட்டதாக அவரை நம்ப வைத்தனர்.

இது குறித்து பாதிக்கப்பட்ட டாக்டர்.இராமசாமி, சென்னை பெருநகர காவல் ஆணையரகத்தில் கொடுத்த புகார் மீது உரிய விசாரணை மேற்கொண்டு நடவடிக்கை எடுக்க சென்னை பெருநகர காவல் ஆணையாளர் அருண் உத்தரவின்பேரில், சென்னை பெருநகர காவல், சைபர் கிரைம் காவல் நிலையத்தில் 6.11.2025 அன்று வழக்குப் பதிவு செய்து விசாரணை மேற்கொள்ளப்பட்டது. இது தொடர்பாக, டிஜிட்டல் கைது மோசடி கும்பலைக் கண்டறிந்து ஒழிப்பதற்காக பிரத்யேகமாக ஒரு சிறப்புப் படை அமைக்கப்பட்டுள்ளது. மேம்பட்ட தொழில்நுட்பக் கருவிகள் மற்றும் பிளாக்செயின் பகுப்பாய்வைப் பயன்படுத்தி, அந்த வாட்ஸ்அப் அழைப்பு கம்போடியாவின் புனோம் பென்னில் இருந்து வந்தது என்பதை அந்தக் குழு கண்டறிந்தது. இடைத்தரகர் கணக்குகளில் பெறப்பட்ட நிதி பல வங்கிக் கணக்குகளில் பரவலாக்கப்பட்டு, போலி நிறுவனங்கள் மூலம் பல அடுக்குகளாகப் பிரிக்கப்பட்டு, இறுதியில் வெளிநாட்டு பணப்பைகள் அல்லது கிரிப்டோகரன்சி பரிமாற்றங்களுக்கு அனுப்பப்பட்டது. இந்த ஆன்லைன் பரிவர்த்தனைகள் டோக்கியோ மற்றும் சிங்கப்பூரில் இருந்து இயக்கப்பட்டுள்ளது தெரியவந்துள்ளது.

இதுபோன்ற போலி அழைப்புகள், அதிக லாபம் தரும் முதலீட்டு விளம்பரங்கள், போலி முதலீட்டு செயலிகள் மற்றும் வலைத்தளங்கள் குறித்து பொதுமக்கள் கவனமாக இருக்க வேண்டும் என்றும், அறியாத வங்கிக் கணக்குகளுக்குப் பணத்தை மாற்ற வேண்டாம் என்றும் மோசடிப் பணப் பரிவர்த்தனைகளுக்காக மோசடிக்காரர்களுக்கு வங்கிக் கணக்குகளைத் துவங்கி உதவிடுபவர்கள் மீது சட்ட நடவடிக்கை எடுக்கப்படும் என்றும் சென்னை கமிஷனர் ஆ.அருண் எச்சரித்துள்ளார்.

இது போன்ற மோசடியால் ஏதேனும் பண இழப்பு ஏற்பட்டால், உடனடியாக 1930 என்ற இணையக் குற்ற உதவி எண் மற்றும் https://cybercrime.gov.in என்ற இணையதள முகவரியில் புகார் அளிக்குமாறும் அவர் அறிவுறுத்தியுள்ளார்.