சுழற்பந்து வீச்சுக்கு எதிராக இந்திய பேட்ஸ்மேன்கள் தடுமாறுவது ஏன்?” - கபில் தேவ் விளக்கம்

சென்னை: சுழற்பந்து வீச்சுக்கு எதிராக இந்திய கிரிக்கெட் அணியின் பேட்ஸ்மேன்கள் தடுமாறுவது ஏன்? என்பது குறித்து முன்னாள் கேப்டன் கபில் தேவ் விளக்கியுள்ளார்.

இந்திய கிரிக்கெட் அணி, அதன் சொந்த மண்ணில் கடந்த ஆண்டு நியூஸிலாந்துக்கு எதிரான டெஸ்ட் தொடரை 0-3 என்ற கணக்கில் இழந்தது. தொடர்ந்து அண்மையில் தென் ஆப்பிரிக்க அணிக்கு எதிரான டெஸ்ட் தொடரை 0-2 என்ற கணக்கில் இழந்தது. இந்த இரண்டு தொடரிலும் (5 டெஸ்ட் போட்டிகள்) மொத்தமாக 62 முறை எதிரணியின் சுழற்பந்து வீச்சாளர்களிடம் விக்கெட்டை இழந்தனர்.

இந்தியா உட்பட ஆசிய நாடுகளை சேர்ந்த கிரிக்கெட் அணிகளின் பேட்ஸ்மேன்கள் பொதுவாகவே சுழற்பந்து வீச்சுக்கு எதிராக சிறப்பான ஆட்டத்தை வெளிப்படுத்துவார்கள். ஆனால், இந்த இரண்டு தொடர்களில் இந்தியாவுக்கு அது தலைகீழாக மாறியுள்ளது.

“இந்திய கிரிக்கெட் அணியின் முன்னாள் பேட்ஸ்மேன்கள், உள்ளூர் கிரிக்கெட் தொடர்களில் வெவ்வேறு ரகமான ஆடுகளங்களில் சுழற்பந்து வீச்சுக்கு எதிராக சிறப்பாக ஆடிய அனுபவத்தை கொண்டிருந்தனர். இதோடு தனிப்பட்ட பேட்ஸ்மேன்களின் ஆட்ட பாணி, ஃபூட் வொர்க் உள்ளிட்டவையும் இதில் அடங்கி இருக்கும்.

இந்நிலையில், இன்றைய தலைமுறையை சேர்ந்த முன்னணி வீரர்கள் எத்தனை பேர் உள்ளூர் கிரிக்கெட் தொடர்களில் விளையாடுகிறார்கள் என்ற கேள்வியை நான் முன்வைக்க விரும்புகிறேன். அதுதான் இதில் மிக முக்கியமான ஒன்று. அப்படி நீங்கள் உள்ளூர் கிரிக்கெட் விளையாடாமல், தரமான பந்து வீச்சாளர்கள் எதிர்கொள்ளாமல் இருந்தால் நிச்சயம் தடுமாறுவீர்கள்.

இதில் ஆடுகள அமைப்பு முக்கியமான ஒன்று. இரண்டரை நாட்களில் முடியும் ஆட்டம் ஐந்து நாட்கள் ஆடும் பார்மெட்டுக்கு உகந்தது அல்ல. டாஸை இழந்தால், ஆட்டத்தில் தோல்வி என்ற நிலையில் உள்ளது. மறுபக்கம் டி20 மற்றும் ஒருநாள் கிரிக்கெட் போட்டிகளில் இப்போது அதிகம் விளையாடி வருகிறோம். இத்தகைய சூழலில் சுழற்பந்து வீச்சுக்கு சாதகமான ஆடுகளங்களில் பொறுமையுடன் ஆட்டத்தை அணுகுவது அவசியம். மேலும், இது மாதிரியான ஆடுகளங்களில் நிலையாக விளையாட உயர்மட்ட திறன் அவசியம். வேகப்பந்து வீச்சை காட்டிலும் சுழற்பந்து வீச்சுக்கு எதிராக சிறப்பாக விளையாட வேண்டிய திறன் இங்கு மிக முக்கியம். டெஸ்ட் கிரிக்கெட்டில் பேட் செய்வது ஆடுகளத்தில் நிலைத்து நின்று ஆடுவது என்பதை தான் குறிக்கிறது.

நிச்சயம் சொந்த மண்ணில் நியூஸிலாந்து மற்றும் தென் ஆப்பிரிக்கா வசம் இந்தியா டெஸ்ட் தொடரை முற்றிலும் இழந்தது எனக்கு சர்ப்ரைஸாக இருந்தது. ஆனால், இந்த தொடருக்கு நாம் இன்னும் சிறந்த முறையில் தயாராகி இருக்க வேண்டும் என கருதுகிறேன். ஏனெனில் டெஸ்ட் கிரிக்கெட் என்பது முற்றிலும் மாறுபட்டது” என கபில் தேவ் தெரிவித்துள்ளார்.