புயல் ஒன்று புறப்பட்டதே!!!!

காற்றழுத்த தாழ்வு பகுதி, காற்றழுத்த மண்டலம், புயல்னு சொல்றாங்க? 

அது காற்று சுழற்சியின் வேகத்தை செயற்கைக்கோளில் இருந்தும் நமது ரேடார்கள் மூலமும் கணித்து புயலின் காற்று சுழலும் வேகம் கூடக்கூட 

அதற்கு பெயர் மாறிக் கொண்டே இருக்கிறது.

மணிக்கு 31.5 கிமீ மேல் சுழற்சி வேகம் இருந்தால் அது காற்றழுத்தத் தாழ்வு பகுதி

அதுவே மணிக்கு 31.5 முதல் 50 கிமீ சென்றால் அது தாழ்வு மண்டலம் (Depression) 

மணிக்கு 50 முதல் 62 கிமீ என்றால் அது ஆழ்ந்த காற்றழுத்தத் தாழ்வு மண்டலம். ( DEEP depression) 

மணிக்கு 62 கிலோமீட்டருக்கு மேல் சுழலும் வேகம் இருப்பின் அது புயலாக கணக்கில் கொள்ளப்படும். 

62-87 வரை புயல்(cyclone) 

87-116 வரை 

தீவிர புயல் ( Severe cyclone) 

116- 222 km/hr வரை அதி தீவிர புயல்( very severe cyclone) 

>222 கிமீ மேல் super cyclonic storm ( அதி பயங்கரப் புயல் / சூப்பர் புயல்) 

இந்த சுழற்சி வேகம் அதிகரிக்க புயலின் மோட்டார் வேகமாக சுழல்வதற்கு முக்கிய தேவை - கடலின் மேற்பரப்பு நீரின் வெப்பமாகும். 

27டிகிரி செல்சியஸுக்கு மேல் கடல் நீர் வெப்பமாக இருக்கும் போது , தொடர்ந்து சுழற்சி வேகம் அதிகமாகிக் கொண்டே இருக்கும். 

இவ்வாறு ஒரு காற்றழுத்தத் தாழ்வு பகுதி புயலாக உருமாறுவது சைக்ளோஜெனெசிஸ் என்று அழைக்கப்படுகிறது. 

இவ்வாறு தீவிரமடைவது (INTENSIFICATION) 

என்று அழைக்கப்படுகிறது. தற்காலத்தில் மீலீனியத்துக்குப் பிறகு தோன்றும் வங்காள விரிகுடா புயல்கள் - முந்தைய புயல்களை விட வேகமாக தீவிரமடைகின்றன என்று ஆய்வுகள் கூறுகின்றன. 

அடுத்து புயல் நகரும் வேகம் இதை TRANSLATIONAL SPEED என்று அழைக்கிறார்கள். 

ஏன் தற்கால வெப்ப மண்டல புயல் சின்னங்கள் வேகமாக தீவிரமடைந்தும் மெதுவாக நகர்கின்றன?

இதற்குக் காரணம் உலகம் தன்னளவில் முந்தைய காலங்களை விட சற்று வெப்பம் கூடியிருக்கிறது. 

சுமார் ஒரு டிகிரி முதல் ஒன்றரை டிகிரி வரை கால நிலை மாற்றம் காரணமாக பூமி சூடாகியிருப்பது உண்மை. 

இதன் காரணமாக 

பூமத்திய ரேகைக்கு அருகில் இருக்கும் வெப்ப மண்டலப் பகுதிகளில் இருக்கும் 

கடல் / விரிகுடா/ பெருங்கடல் ஆகியவற்றின் மேற்புற நீர் 

எப்போதும் சூடாகவே இருக்கிறது

புயல் சின்னம் உருவாக அழுத்தத்தில் தாழ்வு நிலை ஏற்பட வேண்டும் 

அதற்கு கடலின் மேற்புற நீரின் வெப்பம் -27 டிகிரி செல்சியஸுக்கு மேல் இருக்க வேண்டும். 

இதன் காரணமாகவே புயல் சின்னம் உருவாகிறது. 

ஆயினும் 

தற்காலப் புயல்கள் 

முன்னெப்போதும் இல்லாத அளவு 

விரைவாக தீவிரமடைகின்றன (RAPID INTENSIFICATION) 

புயல் தீவிரமடைந்தது என்று கூறப்பட்டால் 

அதன் சுழற்சி வேகம் தீவிரமடைந்துள்ளது என்று பொருள் கொள்ள வேண்டும். 

புயல் தனது கண் பகுதியில் 

ஆழ்ந்த காற்றழுத்த தாழ்வு நிலையைக் கொண்டிருக்கும் 

எனவே தன்னகத்தே ஈரப்பதத்தை உறிஞ்சி இழுத்துக் கொண்டே இருக்கும். இது சுழற்சியாக மாறி வளிமண்டலத்தின் மேலே சென்று நீராவி குளிர்ந்து மேகங்களாக மாறும் 

இதனால் தன்னகத்தே ஈரப்பதம் மிகுதியாகக் கொண்ட மழை தரும் மேகக் குவியல்களை தன்னை சுற்றி சுழன்று கொண்டிருக்கச் செய்யும்

இந்த சுழற்சியின் வேகத்தை (ROTATION SPEED) வைத்துத் தான் 

காற்றழுத்த தாழ்வு நிலை, பகுதி, மண்டலம் 

புயல் என்றும் 

தீவிரப் புயல் என்றும் பெயர் பெறுகிறது. 

இது புயலின் காற்று வீசும் வேகத்தைக் குறிக்கும். 

எனவே புயல் தீவிரமடையும் போது காற்றின் பலமான வீச்சினால் ஏற்படும் சேதங்கள் பொருள்கொள்ளப்படும். 

1971 முதல் 1990 வரை ஏற்பட்ட வெப்ப மண்டல புயல் நிலைகளை ஒப்பிடும் போது 2001 முதல் 2020 வரை ஏற்பட்ட புயல்கள் 28.7% வேகமாக தீவிரமடைந்துள்ளன. 

நவீன காலப்புயல் நிலைகள் 

24 மணிநேரத்திலேயே 50 நாட்ஸ் (> மணிக்கு 90 கிலோமீட்டர்) வேகம் அளவு தீவிரமடைகின்றன. 

முந்தைய காலப் புயல்கள் 

20 நாட்ஸ் எனும் வேகம் எடுக்க 36 மணிநேரங்கள் எடுத்துக் கொண்ட வேளையில் தற்காலப் புயல்கள் 

24 மணிநேரங்களுக்குள்ளேயே அந்த வேகத்தை அடைகின்றன. 

இதற்குக் காரணம் 

வெப்பமான கடலின் மேற்பரப்பு 

அதிலிருந்து எரிபொருளை எடுத்துக் கொண்டு சுற்றிச் சுழலுவதே காரணம். 

எனினும் இதில் இன்னொரு விசயத்தையும் நாம் கவனிக்க வேண்டும் 

"புயலின் நகர்வு வேகம்"

இதை TRANSLATIONAL SPEED என்று அழைக்கிறார்கள். 

மந்தமான புயல் 

மெதுவான புயல் 

மணிக்கு 2 கிமீ 

மணிக்கு 5கிமீ 

மணிக்கு 10 கிமீ வேகத்தில் தான் நகர்கிறது என்று கூறும் போது 

அது புயலின் சுழற்சி வேகத்தைக் குறிக்காது. 

மாறாக அந்தப் புயல் பூமியின் மேற்பரப்பில் நகர்ந்து செல்லும் வேகத்தைக் குறிக்கிறது. 

ஒரு புயலின் சுழற்சி வேகம் அதிகமாக கடலின் வெப்பமான மேற்பரப்பு நீர் தேவை என்று பார்த்தோம் 

அதுவே புயலின் நகர்வு வேகத்திற்கு 

நமது வளிமண்டலத்தில் காற்று வீசும் போக்கும் அதன் வேகமுமே காரணம். 

இவ்வாறு ஒரு புயலை நகர்த்தி வழிநடத்துவதற்கு வளிமண்டல காற்று வீசும் வேகம் முக்கியமாகிறது. கூடவே வழிநடத்தும் அதி காற்றழுத்த மேட்டுப் பகுதிகளின் (RIDGES) விளைவும் புயலின் நகர்வில் பங்காற்றுகிறது. 

வங்காள விரிகுடா புயல்கள் ஏன் 

மேற்கு வட மேற்கு நோக்கியே நகர்கின்றன. 

அதற்குக் காரணம் நமது பூமியின் சுழற்சி மற்றும் அதனால் உண்டாகும் கோரியாலிஸ் விசை. 

1949 முதல் 2016 வரை நடத்தப்பட்ட ஆய்வில் 

வெப்ப மண்டலப் புயல்களின் நகரும் வேகம் 10% குறைந்திருக்கிறது. 

புயல்கள் மெதுவாக நகர்வது என்பது

அந்த புயல்களால் ஏற்படும் மழைப்பொழிவின் அளவை நாம் கணிக்கும் அளவுகளில் இருந்து கூட்டும் வாய்ப்பு அதிகமாகிறது.

காரணம் 

ஒரு புயல் சின்னம் உருவானதும் அது நாம் நினைத்தது போல கரையைக் கடந்து விட்டால் 

குறிப்பிட்ட ஒரு பகுதிக்கு மழை அதிகமாக தராமல் பல இடங்களுக்கும் உள் பகுதிகளுக்கும் மழை பரவலாகத் தரும். 

ஆனால் புயல் ஒரே இடத்தில் அதிலும் கடற்கரை ஒட்டிய கடலில் நங்கூரமிட்டு கடலில் மையம் கொண்டு சுழன்று கொண்டே இருந்தால் ( உதாரணம் : ஃபெங்கல்) 

அல்லது 

கரையை நோக்கி மிகவும் மந்தமான முறையில் நகர்ந்தால் 

அது மையம் கொண்டிருக்கும் இடத்திற்கு அருகில் இருக்கும் பகுதிகளுக்கு தீவிரமான மழைப்பொழிவைக் கொடுக்கும். 

இதற்கு புயல் நிலை கூட அவசியமில்லை. பல நேரங்களில் 

காற்றழுத்த தாழ்வு நிலை மற்றும் மண்டலங்களே 

தீவிர மழைப்பொழிவைக் கொடுக்கின்றன. 

2023 ஆம் வருடம் தூத்துக்குடி மாவட்டத்தில் நிகழ்ந்த மழைப்பொழிவு புயலால் ஏற்படவில்லை மாறாக காற்றழுத்த தாழ்வு மண்டலத்தால் ஏற்பட்டதாகும். 

இவ்வாறு நமது பூமியின் காலநிலை மாற்றத்தால் பூமியின் வெளிப்புறம் வெப்பமடைவதால் முந்தைய காலங்களை ஒப்பிடும் போது

புயல்கள் உருவாகும் எண்ணிக்கையில் மாற்றமில்லை. 

எனினும் உருவாகும் புயல்கள் சுழற்சி வேகத்தில் தீவிரமடைவதும்  

நகர்ந்து செல்லும் வேகத்தில் மந்தமாக இருப்பதும் தொடர்ந்து கண்டு வருகிறோம். 

இதன் காரணமாக 

புயல் என்று உருவானால் 

ஒன்று அதீத தீவிர காற்றின் வேகத்தினால் பிரச்சனை அல்லது 

ஒரே இடத்தில் பல மணிநேரங்கள் 

அதீத மழைப் பொழிவினால் பிரச்சனை என்ற நிலை ஏற்படுகிறது. 

புயல் எங்கு கரையைக் கடக்கும் என்பதிலும் இதனால் தான் சரியான உறுதியான தகவல்களை இறுதி வரை கணிக்க இயலாது. அதற்காகவே "CONE OF UNCERTAINTY" எனும் "நிலையில்லாமையின் கூம்பு" என்று அழைக்கிறோம்.  

எந்த புயல் என்றாலும் நமக்கு நன்மை தரும் மழையைத் தரட்டும்.

மக்களுக்கும் பிற உயிர்களுக்கும் பாதிப்பற்ற மழையைத் தரட்டும்

என வேண்டிக்கொள்வோம்

முனைவர் பாலசந்தர் மண்ணச்சநல்லூர்