மயக்க ஸ்பிரே அடித்து நகை கொள்ளை: ராஜஸ்தான் மாநில கொள்ளையர்கள் 3 பேர் கைது

சென்னை: நகைக் கடை​யில் மயக்க ஸ்பிரே அடித்து தங்க நாணயக் கொள்​ளை​யில் ஈடு​பட்ட ராஜஸ்தான் மாநில கொள்​ளை​யர்​கள் 3 பேர் கைது செய்​யப்​பட்​டனர். அவர்​களில் ஒரு​வர் ஜுவல்​லரி உரிமை​யாளர் என்​பதும் கொள்​ளை​யடித்த நகைகளை வைத்துநகைக்​கடை ஆரம்​பித்த தகவலும் வெளி​யாகி​யுள்​ளது.

சென்னை எழுகிணறு பகு​தி​யைச் சேர்ந்​தவர் ஜெகதீஷ் (34). யானைக்​க​வுனி, வெங்​கட்​ராயன் தெரு​வில் நகைப்​பட்​டறை​யுடன் கூடிய நகைக்​கடை நடத்தி வரு​கிறார்.

கடந்த 24-ம் தேதி மாலை அவர் வழக்​கம்​போல் கடை​யில் இருந்​தார். அப்​போது, அங்கு வந்த இரு​வர் தங்​கக் காசுகள் வாங்​கு​வது போல கடைக்​குள் வந்​து, தங்க நாண​யத்​தில் முத்​திரை பதிக்க வேண்​டும் என்று கேட்​டனர்.

ஜெகதீஷ் உள்ளே சென்று முத்​திரை பதிக்​கும்​போது, திடீரென அவரைத் தாக்கி முகத்​தில் ஸ்பிரே அடித்து மயக்​கமடையச் செய்​தனர். பின்​னர் அங்​கிருந்த ரூ.60 லட்​சம் மதிப்​புள்ள 750 கிராம் தங்க நாண​யங்​கள், வெள்ளி நாண​யங்​கள் மற்​றும் தாமிரத் தகடு​களை கொள்​ளை​யடித்து தப்​பினர்.

நீண்ட நேரத்​துக்​குப் பிறகு மயக்​கம் தெளித்த ஜெகதீஷ், இதுகுறித்து யானைக்​க​வுனி காவல் நிலை​யத்​தில் புகார் தெரி​வித்​தார்.

அதன்​படி போலீ​ஸார் வழக்​குப் பதிந்து விசா​ரித்​தனர். இதில் கொள்​ளை​யில் ஈடு​பட்​டது ராஜஸ்​தானைச் சேர்ந்​தவர்​கள் என்​பது தெரிந்​தது.

இதையடுத்​து, சென்னை போலீ​ஸார் ராஜஸ்தான் மாநிலத்​துக்கு விரைந்​து, அங்கு பாலி மாவட்​டம், கர்​மா​வாஸ் பட்டா கிராமத்​தைச் சேர்ந்த வர்​தா​ராம் என்ற வினோத் (33), அதே மாநிலத்​தைச் சேர்ந்த சர்​வான் குர்​ஜார் (19), ஓம்​பிர​காஷ் (23) ஆகிய 3 பேரை நேற்று முன்​தினம் கைது செய்​தனர்.

பின்​னர் அங்​குள்ள நீதி​மன்​றத்​தில் ஆஜர்​படுத்தி சென்னை அழைத்து வந்து சிறை​யில் அடைத்​தனர். முன்​ன​தாக அவர்​களிட​மிருந்து 414.8 கிராம் தங்க நாண​யங்​கள், 36 கிராம் வெள்ளி நாண​யங்​கள் மற்​றும் 295 கிராம் தாமிரத் தகடு​கள் மீட்​கப்​பட்​டன.

கைது செய்​யப்​பட்ட வர்​தா​ராம் ராஜஸ்​தானில் கே.கே.ஜுல்​லர்ஸ் என்ற பெயரில் நகைக்​கடை நடத்தி வரு​வதும், கொள்​ளை​யடித்த நகைகளைக் கொண்டு ராஜஸ்​தானில் நகைக்​கடை ஆரம்​பித்​து நடத்​தி வந்​ததும்​ தெரிய​வந்​த​தாக போலீ​ஸார்​ தெரிவித்​தனர்​.