புதிய ஓட்டம் !

கவிஞர் இரா .இரவி !

காவிரியில் வரும் தண்ணீர் இன்று புதிய ஓட்டம் 

கர்நாடகத்தில் நிரம்பியதால் தமிழகத்தில் பாய்ந்தது !

சீறிப்பாய்ந்து வரும் நதியை ஓட விடுங்கள் 

சிறைப்பிடித்து வைக்கும் சின்னப்புத்தியை விடுங்கள் !

இரண்டு நாடுகள் கூட அமைதியாகப் பகிர்கின்றன !

ஒரே நாட்டில் பகிர்வதில் சண்டை வழக்கு ஏனோ ?

இயற்கையைச் சொந்தம் கொண்டாட உரிமையில்லை 

இயற்கையைச் சிதைக்காமல் இயல்பாக ஓட விடுங்கள் !

பகிர்ந்து உண்டு வாழ வேண்டுமென்று அன்றே 

பகர்ந்தார் உலகப்பொது மறை தந்த திருவள்ளுவர் !

மூன்று போகம் விளைந்திட்ட தஞ்சையில் இன்று 

ஒரு போகத்திற்கு தண்ணீர் இன்றித் தவிக்கின்றனர் !

யானைக் கட்டிப் போரடித்த தமிழக மண்ணில் 

யாசித்து நிற்கின்றோம் தண்ணீர் வேண்டி !

உச்சநீதி மன்றம் உரைத்தால் வேறு வழி இல்லை 

உடனே நீட் தேர்வு அமுல் என்று சொல்வோர் !

உச்சநீதி மன்றம் தீர்ப்பில் காவிரி மேலாண்மை 

உடனே அமைக்கச் சொன்னால் கேட்காதது ஏனோ ?

உழவர்களின் துன்பத்தை சற்றே உணர்ந்து பாருங்கள் 

உயிரை மாய்த்து வருவது உங்களுக்குத் தெரியவில்லையா ?

தமிழகத்திற்கு நியாயமாகச் சேர வேண்டிய தண்ணீரை 

தமிழகத்திற்கு ஓடிவர உடன் அனுமதியுங்கள் !

நடந்தது நடந்ததாக இருக்கட்டும் இனி நடப்பவை 

நல்லதாக இருக்கட்டும் நடக்கட்டும் புதிய ஓட்டம் !